تاند (شنبه، د سرطان ۲۵ مه) یوې زلزلې چې شدت یې د ریښتر په حساب ۴ اعشاریه ۸ درجې و، نن ماسپښین کابل او د افغانستان یو شمېر نور ولایتونه ولړزول.
د جرمني د زلزله پېژندنې څېړنیز مرکز د دې زلزلې، چې د ماسپښین په ۳ بجې او ۲۷ دقیقې وشوه، سرچینه په سروبي ولسوالۍ کې تر مځکې ۱۰ کیلومتره لاندې وبلله.
تراوسه پورې د دې زلزلې له کبله د سر و مال د تاوانونو په اړه حه نه دي ویل شوي.
د راپورونو له مخې، د زلزلې ټکانونه په لغمان او ننګرهار ولایتونو کې هم احساس شوي دي.
تر دې مخکې د جون په ۲۱ مه په پکتیکا او خوست ولایتونو کې یوې شدیدې زلزلې تر ۱۰۰۰ تنو ډېر کسان مړه او شاوخوا ۲ زره نور ژوبل کړل.