تاند(جمعه، د سرطان ۲۴ مه) د هند د نوشیک رورل پولیسو پرون (پنجشنبې) د یوه افغان پیر، ۲۸ کلن احمدظریف چشتي د قتل په تور څلور تنه ونیول.
احمد ظریف چشتي، چې له تېرو څلورو کلونو راهیسې یې هند ته پناه وړې وه، د خواجه ظریف بابا په نوم شهرت موندلی و. نوموړی د روان جولای په لومړیو کې ووژل شو.
پولیس وايي، له پلټنو وروسته ورته څرګنده شوې چې احمدظریف د خپلو کسانو له لوري وژل شوی ځکه چې هغوی غوښتل چې د ده شتمني لاس ته راوړي چې ارزښت یې لږترلږه له دوه نیم تر ۳ کروړو هندي روپیو پورې رسېږي.
پولیس وايي چې دوی ته اوس څرګنده شوې چې د مقتول ماندینه، چې د افغانستان تابعیت لري، اومیندواره ده او نازېږېدلی ماشوم به یې د شتمنۍ وارث وي.
د چشتي له وژل کېدو وروسته د هغه مېرمن پولیسو ته معلومات ورکړي دي.
ظریف چشتي به خپلې موعظې په خپل یوټیوب چاینل کې خپرولې. ده خپل چاینل په ۲۰۱۷ کال کې جوړ کړی و او ۲ لکه ۲۷ زره فالوران یې لرل.
احمدظریف، چې اصلاً د افغانستان د هرات ولایت اوسېدونکی و، هند ته له کډوالېدو وروسته ځان د چشتیه طریقه د مشهور پیر کړوسی معرفي کړ او ډېر لارویان یې وموندل.