تاند(جمعه، د سرطان ۱۷ مه) د طالبانو د حکومت دفاع وزیر ملامحمدیعقوب مجاهد، چې د قطر په رسمي بلنه دغه هیواد ته تللی، د قطر له مرستیال صدراعظم او د بهرنیو چارو وزیر شیخ محمد بن عبدالرحمان الثاني سره وکتل.
د ګلف ټایمز ورځپاڼې د راپور له مخې، په دې کتنه کې، چې پرون (پنجشنبې) وشوه، دواړو خواوو د افغانستان پر انکشافاتو او د دلچسپۍ په دوه اړخیزو مسلو خبرې وکړې.
د قطر د بهرنیو چارو وزیر او مرستیال صدراعظم له ملایعقوب مجاهد سره په خبرو کې په افغانستان کې د ملي پخلاینې لپاره د کار پر اهمیت ټینګار وکړ.
ده له افغانستان سره د قطر د ملاتړ د دوام یادونه هم وکړه.
تر دې وړاندې وړمه ورځ ملایعقوب مجاهد قطر ته له رسېدو سره سم د دغه هیواد له امیر تمیم بن حمد ال ثاني سره وکتل.
د طالبانو د حکومت له لوري د دیني عالمانو په لویه غونډه کې د ملایعفوب مجاهد څرګندونو د ده په اړه د امربالمعروف او ملا هبت الله خلاف د یوه نرم دریځي طالب تصویر وړاندې کړ. ښايي همدا دلیل وي چې قطر د سفر بلنه ورکړې او په لوړه کچه یې د ده هرکلی کړی دی.