تاند( جمعه ، د سرطان اوولسمه ) د طالبانو د واکمنۍ وياند ذبيح الله مجاهد وايي، چې د دوی د لوی مشر شیخ هبت الله اخندزاده(چې دوی یې امیرالمؤمنین ګڼي) په امر ۹۳۵ بندیان خوشې شوي دي.
د مجاهد په وينا، دغه بندیان د اختر د رارسیدو په مناسبت په ۳۴ ولایتونو کې له زندانونو ازاد شول.
د طالبانو وياند په دې اړه نور جزییات نه دي ورکړي.
دا په داسې حال کې ده، چې له څو ورځو راهيسې په ټولنیزو رسنیو کې د طالبانو له بنده دعماد الدين دوران په نوم د یوه ځوان فرهنګي فعال د خوشې کیدو خبر ورکړل شوی.
دوران د طالبانو پر ځینو کړنو انتقاد کړی و، چې له کبله ېې څو میاشتې په زندان کې تېرې کړې.
ویل کیږي، چې په ضمانت خوشې شوی او اوس هم د طالبانو تر څارنې لاندې دی.
معلومه نه ده، چې طالبانو خپل نور بندیان کړي منتقدان هم خوشې کړي کنه.
د دوی د بهرنيو چارو وزير مولوي امیرخان متقي څو ځله ادعا کړې، چې دوی یو سیاسي بندي هم نه لري.
له دې سره ویل شوي، چې په کابل کې د پاکستان پر ضد د یوه لاریون سمبالګر عظیم عظیمي لا هم د طالبانو په زندان کې بندي دی.