تاند (پنجشنبه، د سرطان شپاړسمه) د کابل په شمالي څنډه ۳۱۵ سيمه کې بېګانۍ جګړه له څو ساعته دوام وروسته د شپې ناوخته پای ته ورسېده.
د طالبانو ویاند ذبیح الله مجاهد وایي، په دې جګړه کې چې د داعش ډلې خلاف تر سره شوه، د داعشیانو پر یو پټنځای عملیات ترسره شوي دي.
د هغه په وينا، دا عمليات او جګړه د ۲ داعشیانو په وژلو او ۴ نورو په نیولو سره پای ته ورسیدل.
د هغه د معلوماتو له مخې،په دې عملیاتو کې ګڼ چاودیدونکي توکي او نور تخریبي وسائل له منځه وړل شوي.
مجاهد زیاتوي:«دغو جنایتکارانو په کابل کې د تخریبي اعمالو اراده درلوده چې په نطفه کول خنثی شول.»
داعش ډلې د نور کله په شان په دې اړه هم څه نه دي ويلي.
ځایي خلکو تېره شپه په دې سيمه کې د طالبانو او په سيمه کې د شته وسله والو کسانو تر منځ د درنې جګړې خبر ورکړی.
دا په داسې حال کې ده،چې طالبانو بیا _بيا د داعش ډلې د ځپلو او له منځه وړلو خبره کړې ده.