تاند(چهارشنبه، د سرطان ۱۵ مه) راپورونه وايي چې د کابل په خیرخانه مېنه کې طالبانو د داعش پر یوه مرکز برید کړی دی. برید د شپې په ۹ بجې پیل شو.
په ټولنیزو رسنیو کې په خپره شوې ویدیو کې د پر له پسې ډزو غږونه اورېدل کېږي او ادعا کېږي چې داعش د ۱۵ امنیتي حوزې د پنځه سوه فامیلۍ د غونډۍ په انجیرک امنیتي پوستې برید کړی دی.
د سیمې اوسېدونکي وايي چې د څو چاودنو ږغونه یې اورېدلي دي.
د طالبانو د کورنیو چارو وزارت د ویندوی خالد ځدراڼ له قوله ځینو رسنیو راپور ورکړی چې هیڅ خبره نه شته خو د کابل پولیسو یوې سرچینې د نوم د نه ښوولو په شرط وویل چې د دغه وزارت ځانګړو ځواکونو د داعش پر یوه پټنځای برید کړی دی.
سرچینې د حملې ځای خیرخانه مېنه وباله او ادعا یې وکړه چې په دې برید کې د داعش څو غړي ژوندي نیول شوي او یو شمېر هم وژل شوي دي.
سرچینې دا هم وویل چې د داعش یو شمېر غړي محاصره شوي دي.