تاند( چارشنبه ، د سرطان پینځلسمه ) د طالبانو د واکمنۍ وياند ذبيح الله مجاهد نن ناوخته تاييد کړه،چې د افغانستان له خاورې پر ازبکستان توغنديز بریدونه شوي دي.
نوموړي په یوه ټویټ کې دغه بریدونه د«شريرو» ډلو کار وباله او ويې ويل،دغه ډلې د دواړو ملګرو هېوادونو ترمنځ د بې باورۍ جوړولو هڅه کوي.
د مجاهد په وينا،دوی هڅه کوي چې د يادو بریدونو عاملین ونیسي او د عمل په سزا یې ورسوي.
د طالبانو ویاند ازبکستان خپل ورور هېواد ګڼلی او ويلي،چې ډاډ ورته ورکوي.
د بلخ ولایت لپاره د طالبانو د امنیه قوماندانۍ ویندوی محمداصف وزیري نن له افغان خاورې پر ازبکستان د توغندیزو بریدونو په اړه د ازبکستان د باندنیو چارو وزارت ادعا رد کړې وه.
وزیري ویلي وو، چې د دوی مخالفو وسله والو غوښتل د ازبکستان پولې ته نژدې ورسره نښته وکړي خو نښته ونه شوه او د دښمن پلان یې مخکې تر دې چې عملي شی، شنډ کړ.
ده همداراز وویل، له دې کبله چې هیڅ نښته نه ده شوې نو د ازبکستان لور ته د مرمۍ د لګېدو خبره ناسمه ده.
ده ونه ویل چې کومې وسله والې مخالفې دلې یې غوښتل چې پر طالبانو برید وکړي.
تر دې شاوخوا یوه میاشت پخوا هم د افغانستان له خاورې پر تاجکستان او ازبکستان د توغندويي بریدونو راپورونه خپاره شوي وو او داعش یې مسوولیت په غاړه اخیستی و.