تاند( سې شنبه ، د سرطان څوارلسمه ) د طالبانو د دفاع وزیر مولوي محمد یعقوب مجاهد، او ورسره مل پلاوی د قطر په رسمي بلنه دغه هېواد ته روان شوى.
د طالبانو په کنټرول کې باختر خبري اژانس ویلي:«ټاکل شوې چې د ملي دفاع وزیر به په دغه دوه ورځني سفر کې د قطر له جګپوړو چارواکو سره وګوري.»
د نوموړي د دغه سفر موخه نه ده په ډاګه شوې.
ګومان کېږي ،چې نوموړی به د طالبانو د لوی کندهار د ډلې په استازيتوب قطر ته تللی وي.
مخکې د يادې ډلې استازيتوب تر ډېره د طالبانو د رييس الوزرا اقتصادي مرستيال ملا عبدالغني برادر کاوه.
ملا برادر اوس سعودي عربستان ته د حج لپاره تللی.
څو میاشتې مخکې روسیې ته له ملابرادر سره یو ځای د ملا یعقوب د نا اعلان شوي سفر خبرونه ورکړل شوي وو،چې طالبانو وروسته رد کړل.
له دې سره،دا لومړی ځل ګڼل کېږي چې طالبانو د خپلې بیا ځلي واکمنۍ له پیله څخه وروسته يوه بهرني هېواد ته د دوی د دفاع وزیر د سفر خبر ورکړی.