تاند( دوشنبه ، د سرطان دیارلسمه ) د هرات ښار په لومړي نمبر سیمه کې نن سهار ناپېژاندو وسله والو د طالبانو ځواکونو سره د دوی پر یوه کاسټر موټر له بريد وروسته وسله واله جګړه کړې ده.
د سرچینو په وینا، په دې پېښه کې ۱۲ طالبان ټپیان او څو بریدګر وژل شوي دي.
طالب سرچېنې وايي، چې درې بریدګرو پر دغه موټر تر ډزو وروسته، موټر ته لاسي بم وغورځاوه.
د دغو مسوولانو په وینا، په نښته کې یو بریدګر وژل شوی او دوه نور له سیمې تښتېدلي دي.
که څه هم په دې برید کې د تلفاتو شمېر نه دی روښانه؛ خو سیمه کې خلک تر ۱۲ د ډېرو ټپيانو د لیدو او ملکي مرګ ژوبلې خبر ورکوي.
ویل کېږي، چې دغه کاسټر موټر په هرات کې د طالبانو د ۲۰۷ الفاروق قول اردو ځواکونو اړوند و.
طالبانو رسما په دې اړه څه نه دي ويلي.
د ياد شوي برید مسوولیت هم کومې ډلې پر غاړه نه دی اخیستی.