تاند( یکشنبه ، د سرطان دولسمه ) د امریکا د بهرنیو چارو وزارت وايي ، چې افغانانو ته د فولبرایټ تحصيلي بورسونو ورکړه بیرته پیلوي.
د وزارت یوه ویاند ویلي ، چې افغانانو ته د دغو بورسونو ورکړه به له راتلونکي میلادي کال څخه پیل کړي.
امریکايي ویاند په دې اړه نور جزییات نه دي ورکړي.
یاد شوي بورسونه په افغانستان کې د جمهوري نظام له سقوط سره سم ، د افغانانو لپاره ځنډول شوي وو.
له امریکا سره د طالبانو د حاکمې ادارې د ترینګلو اړیکو له کبله به ښايي د دغو بورسونو لپاره د کامیابیدونکو کسانو ورتګ د پاکستان او نورو هېوادونو له طریقه وشي.
طالب چارواکو په دې اړه څه نه دي ويلي ، خو ګومان کېږي چې داسې زده کړو ته به په ښه نظر نه ګوري.
د طالبانو د لوړو زده کړو جنجالي وزير مولوي عبدالباقي حقاني څو ورځې مخکې وويل ، چې دوی په اسلامي روحیه په لوړو زده کړو تمرکز کوي.
طالبانو د افغانستان په مختلفو سیمو کې مسلکي انسټیټیوټونه او تاریخي ځایونه په مدرسو بدل کړي او د عصري زده کړو پر وړاندې یې ګڼ خنډونه رامنځته کړي دي.