تاند( پنجشنبه ، د سرطان نهمه )‌‏‏ د طالبانو د واکمنۍ وياند ذبيح الله مجاهد په کابل کې د ملایانو لوېې غونډې ته د ښځو د نه بللو ملامتي خپله پر ملایانو اچولې ده.

نوموړي په یوه خبري غونډه کې ويلي:« د کابل نننۍ غونډه د عالمانو په غوښتنه جوړه شوې او د اسلامي امارت مسوولينو د ښځو د بلنې لپاره په غونډه کې هېڅ رول نه لاره.»

طالب وياند په دې غونډه کې د طالب چارواکو د نه رول خبره په داسې حال کې کوي، چې د غونډې د جوړېدو د کميسيون مشري د طالبانو د رييس الوزرا په ليکلي حکم، د نوموړي اقتصادي مرستيال ملا برادر اخوند کوله.

خپله ملا حسن اخند هم نن دغې غونډې ته راغلی و او له ملایانو څخه ېې د طالبانو د ادعا شوي امیرالمؤمنین سره د بيعت او د مخالفانو خلاف د جګړې د فتوا غوښتنه وکړه.

په دې غونډه کې، چې طالبانو د ملي اونړيوال مشروعيت د ترلاسه کولو د هڅو لپاره جوړه کړې، پکې د ښځو نه ګډون په ملي او نړیواله کچه توند غبرګونونه پارولي.

طالب وياند دا ملامتي په داسې حال کې پر ملایانو اچولې ، چې د طالبانو په امر د افغانستان سلګونه زره نجونې او ښځې له ښوونځيو او کار کولو څخه منع شوي دي.