تاند (پنجشنبه، د سرطان ۹ مه) د جرمني حکومت وايي، لا هم ۱۲ زره افغانان جرمني ته د لېږدېدو انتظار باسي.
دا د هغو افغانانو، چې د تېر کال په اګست کې د طالبانو له واک ته رسېدو وروسته جرمني پناه ورکړې، په درو کې نژدې یوه برخه ده.
د اي پي ډي خبري اژانس د راپور له مخې، د جرمني حکومت د افغانانو د لېږدولو په باب د کیڼ اړخي ګوند د پوښتنې په ځواب کې ویلي چې د روان جون تر ۱۰ پورې ۱۱ زره ۸۶۴ تنه افغانان لا هم په افغانستان یا ګاونډیو هیوادونو کې منتظر دي چې جرمني ته ولېږدول شي.
د جرمني حکومت وايي چې د تېر کال له اګست څخه تراوسه پورې یې خپل هیواد ته د ۳۳ زره ۲۶۳ افغانانو له لېږدولو سره موافقه کړې ده. په دې ډله کې هغه کسان شامل دي چې ژوند یې په افغانستان کې له خطر سره مخامخ و او یا یې د کورنۍ نژدې غړي په جرمني کې مېشت وو. خو اکثریت هغه افغانان دي چې د کورنیو غړیو یې په پخواني حکومت یا د جرمني په موسسو کې کار کړی دی.
د راپور له مخې، تراوسه پورې جرمني ته ۲۱ زره ۳۹۹ افغانان لېږدول شوي دي.
د هغوی په منځ کې ۳۶۰۰ هغه افغانان دي چې د جرمني له پوځ یا د جرمني له موسسو سره یې کار کړی. د دې ډول افغانانو شمېر د هغو د کورنیو له غړیو سره ۱۶ زره ۸۰۰ تنو ته رسېږي.
۱۳۰۰ نور مدني فعالان، د رسنیو کارکوونکي، کلتوري او اکاډیمیک شخصیتونه دي چې باور کېده ژوند یې په ځانګړي ډول له خطر سره مخامخ دی.
د جرمني حکومت وايي چې د دغو کسانو د کورنیو ټول غړي یې هم خپل هیواد ته بیولي دي.
په همدې حال کې کین اړخي ګوند انتقاد کړی چې د افغانانو د ایستلو پروسه تر پخوا پڅه شوې ده.