تاند( پنجشنبه ، د سرطان نهمه ) د طالبانو د لوړو زده کړو سرپرست وزیر مولوي عبدالباقي حقاني د تحصيلي نصاب په اړه یوه سیمینار ته د دیني عالمانو د مسوولیتونو په اړه وینا کړې ده.
نوموړي ويلي، د ټولنې د دیني اړتیاوو لرې کول د عالمانو له جدي مسوولیتونو څخه دي، چې باید د هېواد نوي نسل ته د علم په لېږدولو کې له بل هر وخت څخه زیاتې هڅې وکړي.
مولوي حقاني زیاته کړه:« د هېواد نوی نسل دې ته اړتیا لري چې د معاصرو علومو ترڅنګ په دیني او اسلامي تفکر او عقیدې سره وروزل شي.»
نوموړي د دیني تخصصاتو استادانو ته وویل، چې د مرکز او کندهار د څانګو ترمنځ په یووالي او زیاتې همغږۍ سره کوښښ وکړي، چې په ډيره لږه موده کې د هېواد د ځوان نسل د روزنې په برخه کې ستر بریالیتوبونه او لاس ته راوړنې ولري.
د طالبانو د لوړو زده کړو وزارت د خبرپاڼې له مخې، په دې سیمینار کې د جامعه عبدالله بن مسعود رئیس شیخ عبدالمالک نیازي او نورو ويناوالو د اسلامي اقتصاد د دعوت د لارو چارو افتا، د حدیثونو د ارزښت او د اسلامي ثقافت په اړه خبرې کړي دي.
د طالبانو د لوړو زده کړو وزير ، چې ویل کیږي پوهنتون ېې نه دی لوستی او د پاکستان استخباراتو ته د اکوړه خټک له منسوبې حقانیه مدرسې څخه فارغ دی ، مخکې هم د لوړو زده کړو په اړه بحث جوړونکې خبرې کړې وې.
هغه يو ځل ویلي وو ، چې د جمهوري نظام پر مهال له ښوونځيو او پوهنتونونو څخه فارغ شوي کسان د افغانستان په درد نه خوري.