تاند(چار شنبه، د سرطان اتمه ) د پخواني ولسمشر حامد کرزي د ولسمشرۍ مرستيال او د حزب وحدت په نوم د هزاره ګانو د یوه ګوند مشر محمد کريم خليلي له طالبانو سره د تعامل اوازې رد کړې.
نوموړي په يوه اعلاميه کې، چې د سرپل په بلخاب ولسوالۍ کې د طالبانو او د هغوی د ياغي شوي هزاره قومندان مولوي مهدي د وروستیو نښتو په اړه خپور شوی له طالبانو غوښتي، چې د مخالفینو د ځپلو لپاره یې ملکي او بې طرفه خلک په مختلفو پلمو په تکليف او ونه وځپي.
خليلي خبرداری ورکړی، چې د خلکو په دښمنۍ او ځورولو اخته ادارې دوام نه شي کولای.
هغه زیاتوي چې د بلخاب موضوع د طالبانو خپلمنځي ستونزه ده چې د یوه ناراضه قومندان له لوري یې د حق غوښتنې د داعېې لپاره پيل شوې ده.
دی پر طالبانو د ضمني تورونو له پورې کولو سره وايي، چې د جګړې او وېرې خورولو سياست ناکام دی.
د کریم خلیلي په خبره، دغه جګړه پرته له دې چې هېواد ويجاړوونکې قومي او فرقه يي جګړې ته يوسي ، بله پایله نه لري.
پخوانی مرستیال ولسمشر د یوه اسلامي او ولسواک نظام د رامنځته کيدو یوازینۍ لاره دا ګڼي، چې پر عدالت ولاړ، د خلکو اړتياوو ته ځواب ويونکی او د ټولو خلکو له ګډون او مشارکت څخه برخمن نظام رامنځته شي.
د حزب وحدت ګوند مشر له طالبانو سره د تعامل اوازو ته ېې په غبرګون کې ویلي ، چې ځینو مغرضو او تنګ نظرو کسانو د عامه ذهنیت د مغشوشولو لپاره جعل او دروغو ته مخه کړې او هڅه کوي د ټولنیزو رسنیو له لارې فضا مسمومه کړي.
نوموړي د طالبانو له سرپرست حکومت څخه وغوښتل ، چې د خپلمنځیو جرګو د جوړولو پر ځای په نورو هڅو د ملي او نړيوال مشروعيت د ترلاسه کولو لپاره لاس په کار شي.
کريم خليلي دغه راز طالبانو ته وايي چې معناداره بین الافغاني مذاکراتو مخ واړوي او ټولو سياسي لوریو سره په تفاهم د یوه مشارکتي میکانیزم او د خلکو د رایو پر بنسټ د نظام په جوړولو ، په هېواد کې د سولې او ثبات لاره برابره کړي.
طالبانو د نوموړي څرګندونو ته کوم غبرګون نه دی ښودلی.
دا په داسې حال کې ده چې د طالبانو حکومت په سرپل کې ورڅخه جلا شوی هزاره قومندان مولوي مهدي « فتنه ګر او ياغي » ګڼلی او ويلي ، چې د څو ورځینیو عملياتو په ترڅ کې ځپلی يی دی.