تاند( سې شنبه ، د سرطان اوومه ) د طالبانو مالیې وزارت اعلان وکړ چې سر له نن څخه د یو ټن ډبرو سکرو بیه له ۹۰ ډالرو ۲۰۰ ډالرو ته پورته شوه او صادرېدونکي سکاره به د ۲۰۰ ډالرو د نرخ له درکه محصول کیږي.
د دغه وزارت ویاند احمد ولي حقمل ويلي ، چې ياده پرېکړه سر له ننه عملي کیږي.
طالبانو دا پریکړه په داسې حال کې وکړه، چې له پرون راهيسې زرګونو افغانانو په ټولنيزو رسنيو کې پاکستان ته د ډبرو سکرو د ارزانه صادراتو په اړه توند غبرګونونه وښودل.
د پاکستان صدراعظم شهباز شریف پرون له خپلې کابینې وغوښتل، چې د افغانستان سکاره دې په پاکستاني روپیو وپېري، څو له یوې خوا ډالر په پاکستان کې پاتې شي او له بلې خوا د پاکستاني روپیو ارزښت لوړ شي.
له دې څرګندونو وروسته په پراخه کچه پر طالب چارواکو ولسي فشارونه واچول شول.
په ټولنيزو رسنيو کې ډېرو بهر مېشتو افغان منتقدینو ویلي ، چې طالبان په ارزانه توګه پاکستان ته له دغو صادراتو سره د افغانستان پر وړاندې ملي خيانت کوي.
د طالبانو له بیا واکمنيدو سره د افغانستان د ډبرو د سکرو لسګونه موټرې هره ورځ پاکستان ته صادرېږي.
دا په داسې حال کې ده، چې افغان سوداګر لا هم شکايت کوي چې د دوی مالونه، تازه ميوې او نور سوداګريز توکي پاکستان ته نه پريښودل کيږي.
د يادونې وړ ده ، چې د طالبانو له تازه پریکړې بیرته خلکو پراخ هرکلی کړی دی.