تاند( دوشنبه، د جوزا ۳۰ مه) د پکتیکا سپينې او زواکې ترمنځ د غځیدلي سړک رغنیزې چارې د خلګو پۀ شخصي لګښت پیل شوې.
دغه سړک، چې کابو درې کیلو متره اوږدوالی لري، د اومنې او چهاربران ولسوالیو اوسیدونکو لپاره حیاتي ارزښت لري.
د ځایي خلکو په وینا، د سړک د خرابوالي له آمله ډېر کله ترافیکي پېښې رامنځته کېږي.
د طالبانو تر کنټرول لاندې باختر خبري اژانس د دغه خبر نور جزییات نه دي خپاره کړي.
پرون د ننګرهار د هسکې مېنې ولسوالۍ په اړه تاند راپور درلود، چې ځایي خلکو يې په خپل لګښت د اوبو د مدیریت لپاره د اوبو ۱۲ زېرمې جوړې کړې او پر ۱۳ مې زېرمې جوړولو کار کاوه.
د ځينو شنونکو په باور، په داسې ټولګټو خدمتونو کې د خلکو شامليدل دوی او هېواد دواړو ته ګټه لري او په دې اړه بايد هڅې نورې هم زياتې شي.