تاند( چار شنبه، د جوزا ۲۵ مه) له افغان شخصیتونو سره د طالبانو د تماس کميسيون وايي، چې د دغه کمیسيون له لارې تر دې مهاله تر ۱۰۰ تنه زيات افغان شخصيتونه هيواد ته راستانه شوي.
ياد شوي کميسيون په خپله ټويټر پاڼه کې لیکلي، چې لسګونو نورو شخصيتونو د هېواد ته ستنیدو فورمې ترلاسه کړي او تمه ده چې ژر به هېواد ته ستانه شي.
کميسيون د ستنو شویو کسانو په اړه نور جزییات نه دي ورکړي.
دا په داسې حال ده، چې تر اوسه د محدودو څو تنو د هېواد ته ستنیدو خبرونه خپاره شوي.
د جمهوري نظام څو مطرح څېرې، چې تر اوسه د طالبانو په بلنه هېواد ته راغلي عبارت دي له: فاروق وردګ، صديق چکري، امان الله غالب، جنرال دولت وزیري..
په دوی کې د صدیق چکري او امان الله غالب په اړه ډېر بحثونه شوي او ويل شوي، چې چکري د حامد کرزي د ولسمشرۍ پر مهال د حج او اوقافو وزير په توګه د فساد مهمې دوسيې لري او اوس په دې خاطر هېواد ته راغلی، چې په کابل کې خپل کور خرڅ او بېرته وتښتي.
د بریښنا شرکت د پخواني رييس امان الله غالب په اړه ويل کيږي، چې د افغانستان په نړیوال بانک کې ېې څو میلیونه ډالره پیسې ايسارې دي او دی ېې د ازادولو لپاره راغلی.
هېواد ته د شخصیتونو د ستنولو په نوم د طالبانو دغه لړۍ سختو نيوکو سره مخ ده او ویل کیږي، چې اکثره په فساد ککړ خلک او بې اغېزې خلک د خپلو پيسو د ويستو او ځان سپينولو په نيت هېواد ته ستنيږي.