تاند(شنبه، د جوزا ۲۱ مه) د افغانستان له مختلفو سيمو څخه خبرونه وايي، چې د څو پېښو پر مهال يو پخوانی امنيتي مقام، یو ځوان او يو ټپي شوی ملکي وګړی وژل شوي.
له بدخشان څخه په ورکړل شوي راپور کې راغلي، چې د دې ولايت په بهارک ولسوالۍ کې د ترهګرۍ پر وړاندې د بدخشان د امنیې قومندانۍ د مبارزې پخوانی مدير نصیر احمد د چړو په ګوزارونو وژل شوی.
ځایي سرچينو ويلي، چې نوموړی په شخصي کار و بار بوخت و، چې طالبانو ته منسوبو کسانو وواژه.
په یوه بل خبر کې طالبان تورن شوي، چې د دې ولایت د تالاشۍ په یوه پوسته کې يې د ایمرجنسي روغتون پر یوه ټپي په دې تور ډزې وکړې او ويې واژه، چې ګواکې د مقاومت ډلې غړی و.
سرچينه زياتوي:« دا پېښه د جمعې ورځې له غرمې مخکې د پنجشېر د دالان سنګ سیمې د تلاشۍ په یوه پوسته کې شوې ده.»
د معلوماتو په اساس، دغه کس حبیب الله نومېده او پر پښه ټپي و.
طالبانو تر اوسه د دغو ادعاوو په هکله څه نه دي ویلي
د یوه بل خبر له مخې، د لوګر د مرکز پل علم ښار په پادخواب کې یوه ځوان په سهوي ډزو
خپل ملګری وژل شوی.
د دغې پېښې په اړه هم نور جزییات نه دي تر لاسه شوي.