تاند- جیمز ویب ټیلسکوپ، چې څه کم شپږ میاشتې پخوا فضا ته استول شوی، له یوې وړې اسماني تیږې سره ټکر شوی خو ناسا ورته اندېښمنه نه ده.
د سپېس ویبپاڼې د راپور له مخې، جېمز ویب ټیلسکوپ له یوې خورا کوچنۍ ټیږې یا (micrometeoroid) سره لګېدلی. د دې ډول تیږو وزن تر یو ګرام لږ وي.
دا ټیلسکوپ د ۲۰۲۱ د دسمبر په ۲۵ مه فضا ته واستول شو او له څو میاشتني مزل وروسته د فضا په ژورو کې ټاکل شوي ځای ته ورسېد او اوس خپل ماموریت ته دوام ورکوي.
دا ډېر ګران کار بې جنجاله وشو او په دې وروستیو کې ناسا وویل چې د جېمز ویب له لوري لومړنی ورلېږل شوی علمي او د لوړ کیفیت تصویر به د جولای په ۱۲ مه خپور کړي.
ناسا وايي چې له ټیلسکوپ سره د وړې ډبرې ټکر هغه ته زیان نه دی اړولی او د پخوا په شان کار کوي.
Play