تاند(دوشنبه، د جوزا ۱۶ مه) د افغانستان صنعتي نندارتون پرون په کابل کې د طالبانو د رييس الوزرا د اقتصادي مرستيال ملا عبدالغني برادر اخند په لاس پرانیستل شو.
باختر خبري اژانس، چې د طالبانو تر کنټرول لاندې فعاليت کوي، د سوداګرۍ او صنايعو خونې د مرستیال سخي احمد پیمان په حواله د هېواد د فعاله خصوصي فابریکو په اړه جزييات خپاره کړي.
باختر اژانس د نوموړي په حواله ویلي، چې په افغانستان کې دمګړۍ څه باندې ۵ زره فابريکې فعاله دي، چې ۴ سوه زرو تنو ته پکې په مستقيمه او شاوخوا يو ميليون خلکو ته په نا مستقيمه توګه د کار زمینه برابره شوې ده.
د پروني پیل شوي نندارتون په اړه مسوولینو ویلي، چې د نارینه او ښځینه صنعت کارانو لپاره پکې ۱۵۰- ۱۵۰ غرفې په جلا ډول ايښودل شوي.
لاسي صنايع، خوراکي او غیر خوراکي توکي، درمل، نوشابې او قالینې، د وینځلو توکي او الکترونيکي وسايل د دغه نندارتون عمده شیان دي.
دا درې ورځینی نندارتون سبا او بل سبا هم دوام لري.