تاند(دوشنبه، د جوزا ۱۶ مه) د هېواد له مختلفو سيمو څخه خبرونه څرګندوي، چې د بېلابېلو پېښو له کبله ۴ ښځې زندۍ شوي او يوه نجلۍ او يوه بله له موټر چلوونکي سره ېې د امر بالمعروف ادارې د کارکوونکو لخوا په کېبلونو ډبول شوې ده.
د سمنګان اوسېدونکو ويلي، چې د حضرت سلطان تر پله لاندې یې په دار د ځړول شويو دوو مېرمنو مړي موندلي دي.
سرچینې وايي، چې دا مېرمنې څو ورځې وړاندې پردوی له جنسي تېري وروسته په دار ځړول شوې وې.
ويل شوي، چې د دغو مېرمنو مړي طالبانو د حضرت سلطان ولسوالۍ اړوند سیمه کې خاورو ته سپارلي.
بلخوا: جوزجان کې سرچینې وايي، چې د دغه ولایت مرکز شبرغان ښار کې تېره سهشنبه دوو پیغلو د کورني تاوتريخوالي له امله ځانونه زندۍ کړي دي.
د سرچینو په خبره، یوې پيغلې د شبرغان ښار په څلورمه ناحیه او بلې بیا د دغه ښار په پنځمه ناحیه کې ځان زندۍ کړی دی.
دغه راز یوه بله پېښه چې تېره چهارشنبه شوې، یو ۶۵ کلن سړي د بېوزلۍ او اقتصادي ستونزو له کبله د شبرغان ښار د چرمخانې اړوند سیمه کې ځان زندۍ کړی دی.
له بدخشان څخه په یوه راپور کې راغلي، چې د طالبانو د امر بالمعروف ادارې کسانو د دغه ولايت د ددولتي پوهنتون د سیاسي علومو پوهنځي یوه محصله اريا او په موټر کې د هغې لېږدونکی ( موټر چلوونکی) له دې کبله په کېبلونو وهلې، چې ولې ېې ماسک نه و اغوستی.
طالبانو په رسمي ډول د یادو پېښو په اړه څه نه دي ويلي.