تاند(دوشنبه، د جوزا ۹ مه) د طالبانو ویاند ذبیح الله مجاهد د « عاجل» تر عنوان لاندې د دوی د معادن او پټرولیم وزارت د ۴ نویو مرستيالانو د ګومارل کیدو خبر ورکړی.
نوموړي په خپله ټويټر پاڼه کې ليکلي، چې دا ګومارنې د طالبانو د لوی مشر ملا هیبت الله اخوند زاده په امر شوي دي.
نوموړي زياته کړې، چې په دغو ګومارنو کې شیخ ضیاء الرحمن الاریوبي؛ د ياد شوي وزارت د پلان او پالیسۍ، مولوي حسام الدین صابري د مالي او اداري، وحیدالله حلیمي؛ د د تخنیکي او نورالله ستانکزی د جیولوجي سروې د معین په توګه ټاکل شوي دي.
ذبيح الله مجاهد د دغو ګومارنو او مخکینیو چارواکو د ګوښه کیدو په اړه نور جزییات نه دي ورکړي.
په وروستيو کې د طالبانو د معادن او پټرولیم وزارت چارواکي د معدنونو د خپلسري استخراج په برخه کې په پراخ فساد تورن شوي وو.