تاند(جمعه، د جوزا ۶ مه) د طالبانو د پوهنې وزیر شیخ نورالله منیر نورستان ته په سفر کې ويلي، چې محرومو ولایتونو ته به د پوهنې په برخه کې ځانګړې پاملرنه کېږي.
د ښاغلي منیر د څرګندونو له مخې؛ ډېر ژر به د نورستان په ټولو ولسوالیو کې سیمه ییز ټولګي او دیني مدرسې جوړې شي.
هغه په دې اړه نور جزییات نه دي ورکړي.
نورستان د افغانستان له تر ټولو محرومو ولايتونو څخه دی، خو مدرسې او د ديني زده کړو نور پریمانه امکانات لري.
ځايي خلک باور لري، چې طالبان په دې ولايت کې د سلفي باورو مسلمانانو له ورځ تر بلې پراختيا څخه، چې دا ولایت یې خپل کړی او نورو سيمو ته هم د غځیدو په حال کې دي، ویریږي.
په افغانستان کې طالبانو سره باور دا دی، چې سلفي باورو مسلمانانو نه داعش ډله په اسانه جلب و جذب کولای شي.
د نورستان یو شمېر اوسیدونکو چې نه یې غوښتل نومونه یې واخیستل شي، ویلي چې که طالبان ریښتیا لومړیتوب ورته ورکوي، په بشري مرستو او انکشافي پروژو کې دې لومړیتوب ورکړي.