تاند(پنجشنبه، د جوزا ۵ مه) په کندهار کې د طالبانو ځايي چارواکو ویلي، چې پاکستان ته یې د وسلو ۵۰ قاچاق کېدونکي دوربینونه نیولي دي.
د طالب چارواکو په خبره، دا دوربینونه یوه کس په ډېر مهارت سره په موټر کې ځای پر ځای کړي وو، خو د کندهار په ګمرک کې نیول شوی دی.
د ياد شوي کس د هویت او نورو جزيياتو په اړه څه نه دي ويل شوي.
پاکستان ته د افغانستان له خاورې د وسلو او تجهيزاتو د قاچاق خبرونه د طالبانو له واکمنیدو سره زیات شوي او خپله طالبان یې په پراخه کچه په قاچاق او خرڅلاو تورنیږي.
طالب چارواکو بیا په پراخه کچه د دې ستونزې موجوديت او خپل لاس لرل پکې بيا- بيا رد کړي دي.
پرون د پاکستان د کورنیو چارو وزارت وويل، چې په پلازمېنه اسلام اباد کې یي د پخواني صدراعظم عمران خان د معنرضو پلویانو له یوه موټر څخه ګڼې امریکايي وسلې، چې له افغانستان څخه پاکستان ته قاچاق شوې وې، نیولي او ورڅخه په پلان شویو متشددو لاریونونو کې د استفادې مخنیوی شوی دی.
طالبانو په دې اړه څه نه دي ويلي.