تاند(شنبه، د ثور ۳۱ مه) له افغان شخصیتونو سره د اړيکو او هېواد ته د بیرته ستنیدو په اړه یې د طالبانو کمیسیون نن خپله کاري تګلاره اعلان کړه.
د دغه کمیسیون رییس او د طالبانو د معادن او پټرولیم وزیر مولوي شهاب الدين دلاور په دې اړه جوړه شوې خبري ناسته کې وويل، چې راستنيدونکو افغان شخصیتونو ته د امنيتي خونديتوب تر څنګ ځینې امتیازات هم ورکول کېږي.
د هغه په وینا، د طالبانو حکومت به د ستنیدونکو افغان شخصیتونو مشروع غوښتنو ته ځواب ووايي.
هغه په دې اړه نور جزییات ورنه کړل.
مخکې د طالبانو د بهرنيو چارو وزارت سياسي مرستيال عباس ستانکزي ویلي وو، چې افغان سیاستوال او پخواني چارواکي بیرته هېواد ته ستنیدای شي، خو د وزارتونو او نورو لوړو څوکيو تمه دې نه کوي.
د طالبانو د یاد شوي کمېسيون د کاري تګلارې له اعلان سره په یوه ورځ د طالبانو د امر بالمعروف وزیر شېخ محمد خالد پخواني ولسمشر حامد کرزي ته د يوې نیوکې په غبرګون کې په سپکونکې لهجه غبرګون ښودلی.
کرزي د ټلویزیونونو له ښځينه وياندويانو غوښتي وو، چې د مخ پټولو او ماسک اچولو په اړه د طالبانو غوښتنه ونه مني.
طالب وزير د کرزي په غبرګون کې وويل، چې هغه ۲۰ کاله د بهرنيانو د خوشالولو لپاره افغان ښځو ته ازادي غوښته، خو خپله مېرمنه یې له رسنيو لیرې په کور کې ساتلې وه.
ځینې شنونکي بيا وايي، چې کرزي سره د داسې چلند او هم یې بهرنيو سفرونو ته د نه اجازې په صورت کې طالبانو ته سخته ده، چې نور سیاستوال هېواد ته په ستنېدو قانع کړي.