تاند(سې شنبه، د ثور ۲۷ مه) د طالبانو د واکمنۍ د ویاند مرستیال انعام الله سمنګاني د دوی د مشرتابه له لوري نن د افغانستان د اداري نظام د يو شمېر اداري واحدونو د لغوه کیدو په اړه توضیحات ورکړي.
د طالبانو په يوه مکتوب کې، چې پرون رسنيز شو، د بشري حقونو او د اساسي قانون د تطبيق پر څارنې خپلواک کميسیونونه، د مصالحې عالي شورا، د ملي امنيت شورا او د ملي شورا د مشرانو او ولسي جرګې دارالانشاګانې لغوه شوي دي.
نن د طالبانو يوه وياند انعام الله سمنګاني په دې اړه د نیوکو په غبرګون کې ويلي، چې يادې ادارې غیر فعاله وې او دوی د مالي کال په بوديجه کې تخصیص نه درلود.
د نوموړي په وينا، يادې ادارې به د اړتيا په صورت کې بیرته فعال کړل شي.
د طالبانو په یوه رسنيز شوي مکتوب کې پرون د دوی د رييس الوزرا د اداري مرستيال مولوي عبدالسلام حنفي په لاسليک لیکل شوي، چې يادې ادارې د طالبانو د لوی مشر ملا هیبت الله اخوند زاده ( چې دوی یې امیرالمؤمنین ګڼي) په شفاهي امر لغوه شوي.
دا اداري جوړښتونه په داسې مهال لغوه شوي، چې له افغانستان څخه تازه بهر ته تللي د جمهوري نظام د مصالحې د عالي شورا رییس ډاکټر عبدالله عبدالله په وروستيو کې پر طالبانو توندې کنايوي نيوکې کړي.
عبدالله طالبان په شمال کې د خلکو په مستندو وژنو تورن کړي او خبرداری یې ورکړی، چې د اوسنيو سياستونو دوام یې هېواد کورنۍ جګړې ته ور کاږي.
طالبانو د عبدالله څرګندونو ته غبرګون نه دی ښودلی، خو معلومه نه ده چې د دغو اداري تشکيلاتو او په خاص ډول د مصالحې عالي شورا د لغوه کیدو پریکړه خو به د عبدالله څرګندونو سره تړاو نه لري؟