تاند:( شنبه، د ثور څلور ویشتمه) د طالبانو د پوهنې وزارت په ۸ ولایتونو کې د ښوونکو نيږدې ۷ زره بستونه اعلان کړل.
د دغه وزارت د اعلامیې په اساس، په دغو بستونو کې د تدريس تر څنګ اداري بستونه هم شامل دي.
سرچینه زیاتوي: دغه بستونه د ۸ ولایتونو(هرات، فراه، غور، بادغیس، ننګرهار، لغمان، کونړ او نورستان) اړوند دي.
له دغو بستونو څخه ۲ زره ۷۷۷ یې ښځو ته ځانګړي شوي دي.
د طالبانو د پوهنې وزارت چارواکو ويلي، چې دغو بستونو ته د ازادۍ سیالۍ له لارې کسان جذبېږي.
يو شمير خلکو د بستونو د دغه اعلان هرکلی کړی او ویلي، چې طالبان باید هر څومره ژر د نجونو تړلي ښوونځي هم بیرته پرانیزي.