تاند:( پنج شنبه، د ثور دوه ويشتمه) په هلمند کې د طالبانو امنيتي چارواکو ويلي، چې د کوکنارو د کرکيلې د له منځه وړلو کمپاين يې پيل کړی.
د دوی په وینا، دغه کمپاين يې په نوزاد، واشير، باباجي او مارجې ولسواليو کې پیل کړی.
د سرچينو د معلوماتو په اساس، تر اوسه یې د کوکنارو لسګونه جريبه فصل له منځه وړی او دا لړۍ لا پسې دوام لري.
د طالبانو لوی مشر ملا هیبت الله اخوند زاده ( چې دوی یې امیرالمؤمنین ګڼي) څه موده مخکې د کوکنارو او نورو نیشه یي توکیو د کرلو او کاروبار د مخنيوي او عاملانو سره یې د سخت چلند حکم ورکړ.
ياده پرېکړه د ځينو نړيوالو لوريو له هرکلي سره مخ شوه، خو افغان کروندګرو ټینګار وکړ چې د کوکنارو د بديل معيشت غم یې باید وخوړل شي.