تاند:( دوشنبه، د ثور نولسمه) د طالبانو د پرله پسې انکار سره- سره د دوی مخالفې جنګی ډلې او ځايي خلک په يو شمېر ولايتونو کې د سختو جګړو او د لسګونو تنو د مرګ ژوبلې ادعاوې کوي.
د طالبانو په خلاف د پنجشېر مقاومت ډلې وياند صبغت احمدي ادعا کړې چې د بغلان ولايت په اندراب ولسوالۍ کې يې وسله والو له طالبانو سره جګړه کړې او ماتې يې ورکړې ده.
د نوموړي د ادعا له مخې، په دې نښته او جګړه کې د طالبانو د بدري، فدايي او سرې قطعې ډلو تر ۲۷ پورې وسله وال وژل شوي.
سرچینه په دې ادعا شويو نښتو کې د خپلو ۳ جنګياليو ټپي کيدل هم مني.
د پنجشېر یو شمېر اوسیدونکو بیا پر طالبانو تور پورې کړی، چې د پنجشېر درې ولسوالۍ په عبدالله خېلو سیمه کې ېې له پرون راهیسې د یوې ښځې په ګډون ۸ ملکي وګړي وژلي دي.
ځایي خلکو د طالبانو په لاس د وژل شويو دغو کسانو نومونه هم رسنيز کړي.
په تخار کې بیا ځايي سرچينو په ورسج ولسوالۍ کې د طالبانو او مقاومت ډلو د نښتې او کې ځايي سرچینې وايي، چې د طالب او مقاومت جبهې ځواکونو د دغه ولایت په ورسج ولسوالۍ کې نښته کړې ده.
د دوی په وینا، دا نښته د «قوندز» حوزې په سیمه کې شوې، چې له امله يې ۱۲ طالب ځواکونه وژل شوي او درې نور ټپيان دي.
د دغو سرچینو په خبره، په دغو نښتو کې د طالب ځواکونو څلور رنجر موټر هم ویجاړ شوي دي.
د ننګرهار د اچین ولسوالۍ په شډل سیمه کې د طالبانو د سرحدي ځواکونو یو قوماندان د سړک غاړې ماين په يوه چاودنه کې وژل شوی او درې نور ټپيان دي.
د دې پېښې مسووليت د افغانستان د ازادۍ ملي او اسلامي جبهې پر غاړه اخيستی دی.
دغه ډله، چې مشري یې د جمهوري نظام د ملي پوځ یو جنرال عبدالمتین سلېمانخېل کوي، تر ډېره په پښتني سيمو کې د طالبانو خلاف د جګړې ادعاوې کوي.
طالبانو يادو ټولو ادعاوو ته غبرګون نه دی ښودلی.
پر دوی تور پورې دی، چې رسنيو ته د داسې ادعا شویو پېښو په اړه معلومات نه ورکوي.
طالبانو بيا داسې ادعاوې رد کړي دي.