تاند:(شنبه، د ثور لسمه) د افغانستان د بریښنا شرکت چارواکي وايي، چې د پروان ولایت اړوند د سویلي سالنګ په تاغمه سیمه کې د وارداتي برېښنا دوې پایې په ماینونو نړولي.
د سرچينې د معلوماتو له مخې، له دې امله د کابل او ۱۰ ولایتونو برېښنا پرې شوې ده.
بریښنا شرکت وایي، چې تخنیکي ټيمونه يې هڅه کوي څو د تجهیزاتو لېږد زمېنې په برابریدو سره د پایو رغولو لپاره پلان ترتیب او کار پيل کړي.
په ټولنیزو رسنیو کې ډېرو افغانانو د يادو پايو الوزول غندلي او په دې مبارکه روژه کې يې د خلکو پر وړاندې ظلم ګڼلی دی.
د يادې پېښې مسووليت چا يا کومې ډلې پر غاړه نه دی اخیستی، خو عام باور دا دی چې د طالبانو مخالفې وسله والې ډلې به يې عامل وي.
ځينو خلکو طالبانو ته په خطاب کې ویلي، چې که د تېر جمهوري نظام پر مهال يې داسې پېښې نه وای رامنځته کړي، نن به هم د دا ډول پېښو شاهدان نه وو.
طالب چارواکو په دې اړه څه نه دي ويلي.