(چهارشنبه، د ثور ۷ مه) له مسکو وروسته د اریانا افغان هوايي شرکت د ایران مشهد ته هم الوتنې پیلوي.
د طالبانو تر واک لاندې د افغانستان د ترانسپورت او هوايي چلن وزارت نن وویل چې «د اریانا افغان هوايي شرکت» به ژر د ایران مشهد ښار ته الوتنې بیل کړي.
د ترانسپورت او هوايي چلن وزارت د خبرپاڼې له مخې، مشهد ته به له اوږده ځنډه وروسته د اریانا افغان هوايي شرکت الوتنې د مې په شپږمه، چې د ثور له ۱۶ سره برابرېږي پیل شي او له یادې نېټې وروسته به په اوونۍ کې ۳ الوتنې کوي.
په خبرپاڼه کې وړاندې راغلي چې مشهد ته به د اریانا افغان هوايي شرکت الوتکې د یکشنبو، سې شنبو او جمعو په ورځو الوتنې کوي.
پرون په کابل کې د روسیې سفارت ویلي و چې د طالبانو له واک ته رسېدو وروسته د لومړي ځل لپاره له کابل څخه د اریانا افغان هوايي شرکت یوه مسافري الوتکه مسکو ته والوته.
ټاکل شوې ده چې د اریانا افغان هوايي شرکت الوتکه د دوشنبو په ورځو مسکو ته والوځي او د سې شنبو په ورځو له مسکو څخه بېرته کابل ته راوګرځي.