تاند:( چارشنبه، د ثور اوومه) د ايران يوه نېمه دولتي خبري اژانس تسنيم له طالبانو سره د سرحدي ناندريو په اړه د خپل حکومت د پرونیو خبرو جزییات خپاره کړي.
د ايران د سپاه پاسداران استخباراتي ځواک دغه اړوند اژانس د طالبانو د دفاع وزارت له سرحدي مقام مولوي شبير احمد سره د ايران د مرستيال سفير سید حسین مرتضوي د لیدنې په اړه ویلي، چې دا لیدنه د وروسیتو سرحدي ناسم پوهاویو د حل په هدف شوې ده.
تسنيم اژانس وايي، چې د لیدنې پر وخت طالب مقام د میلیونونو افغان کډوالو د کوربه توب له امله د ایران حکومت نه مننه کړې او ورسره پر ښو اړیکو یې ټینګار کړی دی.
سرچینه د طالب چارواکي په حواله وايي، چې د طالبانو د دفاع وزیر ملا یعقوب مجاهد امر کړی، چې هیڅوک له ایران سره په ګډه پوله کې د وړې ناندرۍ او پوځي قوت ښودلو اجازه نه لري.
تسنیم اژانس د مولوي شبير احمد له خولې لیکي، چې طالب چارواکي له ایران څخه په ګډه پوله کې د انساني قاچاق، نیشه یي توکیو او ترهګرۍ پر وړاندې مبارزه کې د هر اړخیزو همکاریو تمه لري.
ويل شوي، چې په لیدنه کې له اختر څخه وروسته طالبانو د سرحدي ستونزو د حل لپاره د یوه څلور کسیز پلاوي په وسیله ایران سره د مذاکراتو هوکړه کړې ده.
د دې ترڅنګ ټاکل شوې، چې نن د مولوي بریاني په نوم په هرات کې د طالبانو یو چارواکی له ایراني لوري سره د رامنځته شویو ستونزو په حل وغږيږي.
له څو ورځو راهيسې یو شمېر رسنیو د افغانستان او ایران په ګډه پوله کې د احتمالي نښتې او ورته د پوځي او نورو اماده ګیو خبر ورکړل شوی.
ايراني رسنۍ بیا د دواړو لوريو د چارواکو په حواله دا راپورونه رد کړي دي.
طالبانو د پرونۍ لیدنې په اړه رسنيو ته څه نه دي ويلي.
د دوی ځینو مطبوعاتي مبلغينو پرون ویلي وو، چې د دفاع وزارت چارواکو یې د ایران د سفیر مرستیال احضار کړی دی.
ایران له ط سره د سرحدي ناندريو په اړه د پرونیو خبرو جزییات خپاره کړل