تاند:( دوشنبه، د ثور پينځمه) د ایران د بهرنیو چارو وزارت وياند سعيد خطیب زاده په یوه بېساري دریځ کې د افغانستان د قومي جوړښتونو په اړه مغرضانه خبرې کړي دي.
نوموړي نن په یوه خبري ناسته کې ویلي، چې پښتانه د افغانستان اکثريت نه، بلکې نورو ډېرو قومونو غوندې اقلیت دي.
ایراني وياند مدعي شو، چې افغانستان کوم اکثريت نه لري او د اقلیتونو هېواد دی.
د نوموړي دا څرګندونې د یو شمېر افغانانو له توندو غبرګونونو سره مخ شوي دي.
د افغانستان مشهور ژورناليست او لیکوال ډاکټر داوود جنبش او ګڼو نورو خلکو د ایراني وياند یادې څرګندونې غندلي او د افغانستان په کورنيو چارو کې شرمونکې لاسوهنه ګڼلې ده.
د طالبانو چارواکو په دې اړه څه نه دي ويلي.
ايراني ویاند نن په افغانستان کې د داعش ډلې د بریدونو په زیاتیدو له اندیښنې ښودلو سره ويلي وو، چې هېواد به یې په دې برخه کې د مقابلې لپاره ژر لاس په کار شي.
د نوموړي يادو څرګندونو ته هم طالبانو غبرګون نه دی څرګند کړی.