تاند:( یکشنبه، د ثور څلورمه) د بدخشان د مرکز فيض اباد ښار په « پل باغ شاه» سیمه کې نن د طالبانو پر يوه هايليکس موټر چاودنه شوې ده.
ځينې ځايي سرچينې وايي، چې چاودول شوی موټر د طالبانو د معادن او پټرولیم د رييس مولوي عبدالفتاح اړوند دی.
ويل کيږي، چې په چاودنه کې نوموړی طالب مقام او ۳ ساتونکي يې وژل شوي او یو شمېر نور ساتونکي یې ټپيان دي.
طالب چارواکو او وياندويانو په دې اړه څه نه دي ويلي.
د دغې چاودنې مسووليت چا پر غاړه نه دی اخیستی.
په وروستيو کې د افغانستان له مختلفو ولايتونو څخه د نا امنۍ خبرونه زيات شوي.
طالب مشران په پرله پسې ډول پر ټول هېواد د حاکميت او وضعیت ښه کیدو ډاډ ورکوي، خو خلک روان وضعيت اندیښمن کړي دي.