تاند:( دوشنبه، د حمل ۳۰ مه) په ملګرو ملتونو کې د افغانستان د پرزول شوي جمهوري نظام د استازيتوب سرپرست نصير احمد فایق په افغانستان کې د پاکستان له لاسوهنو څخه دغه نړیوال سازمان ته شکایت کړی دی.
فایق زياتوي:« په کونړ او خوست ولایتونو کې د خلکو پر کورونو د پاکستان هوايي بریدونه، د افغانستان پر حریم څرګند تېری دی.»
نوموړي ټینګار کړی، چې په رسمي توګه یې امنیت شورا ته شکایت کړی او د دغه ډول کړنو د چټک درېدو او د ملګرو ملتونو د قانون پر بنسټ ورته د پاملرنې غوښتنه شوې ده.
پاکستاني الوتکو څو شپې مخکې په خوست او کونړ ولايتونو کې د بمبارۍ پر مهال لسګونه وزيرستاني کډوال او د کونړ اوسیدونکي ووژل.
د طالبانو لوړ پوړو چارواکو لږ تر لږه تر اوسه د دې بمباریو د تلفاتو ارقام هم نه دي رسنیز کړي.
له دې کبله د طالبانو د حکومت چارواکي د خلکو سختو نيوکو سره مخامخ دي.