تاند:( شنبه، د حمل ۲۷ مه) د طالبانو د بهرنيو چارو وزارت له اسلامي هیوادونو غوښتي، چې د دوی په ټکيو د اسراییلو د ظلمونو د مخنيوي لپاره عملي اقدام وکړي.
د دغه وزارت په يوه اعلاميه کې راغلي، چې دوی:« د مسلمانانو لومړنۍ قبلې، اقصی جومات کې پر ملکي فلسطينيانو د اشغالګرو له خوا تاوتريخوالی په سختو ټکو غندو».
اعلاميه زياتوي:« پر نړيوالې ټولنې په ځانګړې توګه اسلامي هيوادونو غږ کوو چې د فلسطينيانو د انساني حقونو د اعادې او د اسراييلي مظالمو د مخنيوي لپاره عملي اقدام وکړي.»
د طالبانو دا اعلامیه په داسې حال کې ده، چې ګڼ شمېر اسلامي هېوادونه بيا- بيا له دوی څخه د نجونو د تړلو ښوونځيو د بېرته پرانيستلو غوښتنې کوي، خو طالب چارواکو په دې اړه د افغانانو تر څنګ د اسلامي هېوادونو او نړیوالو غوښتنو ته مثبت ځواب نه دی ورکړی.
د طالبانو حکومت تر اوسه د نړۍ هیڅ کوم هیواد په رسميت نه دی پېژندلی.