تاند:( جمعه، د حمل ۲۶ مه) د طالبانو امنيتي ځواکونو تېره شپه په کابل کې د هغه پارونکي بې لاریون سمبالګر نیولی، چې څو ورځې مخکې یې له ایران سره د افغانستان د ترینګلو اړیکو باوجود د هغه هېواد په ملاتړ لاریون کړی و.
ويل شوي، چې نیول شوی کس یارمحمد رحمتي نومیږي او تېره اونۍ یې د ایران د سفارت مخې ته د ګلانو د پاشلو او د ایران خلاف د افغان اعتراضونو له کبله له ایران څخه بښنه غوښتې وه.
د راپورونو په اساس، نوموړي د ایران په مرستو د « تبیان» په نوم د یوه فرهنګي مرکز مشري هم کوله، چې دفتر یې ور تړل شوی دی.
د طالبانو ځینو سرچینو ویلي، چې نوموړی له عامه احساساتو سره د لوبې له کبله نیول شوی.
تېره اونۍ په افغانستان کې د ایران د ځواکونو له لوري د افغانانو د شکنجې او سپکاوي له کبله مختلف لاریونونه وشول او په هرات کې یې د کونسلګرۍ دروازې ته اور واچول شو.
له هغې پېښې وروسته یو شمېر افغان اهل تشيع، چې خلکو د ایران په لاسپوڅۍ تورن کړل، د ایران د سفارت مخې ته له ګلانو سره لاړل او له دغه هېواد څخه ېې بښنه وغوښته.
د دوی د مشر پر وړاندې د طالبانو تازه اقدام ځینو خلکو ستایلی، خو یو شمېر نورو ويلي چې خپله طالبان هم هره ورځ په نویو افراطي اقداماتو د افغانانو له احساساتو او برخليک سره خطرناکې لوبې کوي.