تاند:( دوشنبه، د حمل ۲۲ مه) په پروان کې د طالبانو امنيتي چارواکو ویلي، چې ځواکونو یې نن سهار د دې ولايت په بګرام ولسوالۍ کې له انسان تښوونکو سره له نښتې وروسته د هغوی ۴ تنه نیولي.
په پروان کې د طالبانو د امنيه قومندانۍ ویاند محمد کامران حبیبي ویلي، چې په دې نښته کې یو اختطافګر ټپي شوی او له نښتې وروسته د ټپي شوي په ګډون ۴ اختطافګر د دوی ځواکونو نیولي دي.
ځايي سرچينو په دې اړه څه نه دي ويلي.
يو شمېر سرچينو مخکې تاند ته ویلي وو، چې طالبان په پروان او نيږدې ټول هېواد کې د داعش او مقاومت ډلو کسانو سره نښتې، د هغوی خلاف عمليات او نور اقدامات ټول د « اختطافګرو» په نوم نوموي او په دې ډول د خپلو مخالفو ډلو په موجوديت پرده غوړوي.
په پروان کې له پخوا څخه د اختطافګرو او نا مسووله وسله والو ډلې هم موجودې وې، خو ويل کيږي چې ډېرو دې ډلو د شمال ټلوالې د مخکینیو جهادي ډلو سره تړاو درلود.
اوس ګومان کېږي، چی اکثره همدغو ډلو د طالب ضدو مقاومت ډلو سره هم لاس یو کړی او د طالبانو پر ضد چریکي فعاليتونه کوي.