تاند:( یکشنبه، د حمل ۲۱ مه) د کرکټ نړیوالې شورا د افغانستان د کرکټ په اړه په ځانګړې غونډه کې، له دغه کرکټ څخه مشروط ملاتړ اعلان کړی.
د دغې شورا په پریکړه کې راغلي، چې د افغانستان له نارینه کرکټ څخه ملاتړ کوي، خو د ښځینه کرکټ د پراختيا او د کرکټ بورډ د مشرۍ له څرنګوالي به څارنه کوي.
د افغان کرکټ بورډ په اړه په دې غونډه کې د افغانستان د کرکټ بورډ رييس او د کرکټ ملي لوبډلې پخواني لوبغاړي ميرويس اشرف د افغان کرکټ په استازيتوب ګډون درلود.
دا په داسې حال کې ده، چې طالبانو د له شپږم ټولګي څخه پورته د افغان نجونو ښوونځي هم تړلي دي.
ګومان نه کیږي، چې طالبان به ښځينه کرکټ لوبغاړو ته د لوبو اجازه ورکړي.
د طالبانو د حقاني شبکې یوه مخکښ انس حقاني نن په خپله ټويټر پاڼه کې د کرکټ نړیوالې شورا د پریکړې هرکلی کړی او ویلي، چې افغان کرکټ به له سیاسي مسایلو لیرې او مستقل پاتې شي.