تاند:( شنبه، د حمل ۲۰ مه) په غزني ولايت کې پرون يو ځوان وژل شوی، چې خپلوان يې د وژلو پړه د طالبانو پر امنيتي ځواکونو اچوي.
دغه ځوان شفيع مدثر زاده نوميده او د کرنې له پوهنځي فارغ و.
د نوموړي يوه خپلوان ډ نوم نه خپريدو په شرط رسنيو ته ويلي، چې مدثر زاده پرون د جمعې په ورځ د تفريح لپاره تللی و، چې طالبانو وژلی دی.
هغه زياته کړې، چې وژل شوي ځوان په غزني کې دوکان درلود، خو نور يې په اړه جزییات نه دي ورکړي.
د طالبانو ځايي چارواکو په دې اړه څه نه دي ويلي.
بل لور ته: په فاریاب ولایت کې يوې ۱۵ کلنې نجلۍ ځان وژلی.
دا پېښه پرون د ګرزیوان ولسوالۍ په ده میران سیمه کې رامنځته شوې ده.
ويل شوي، چې دغه نجلۍ د میرني مور له فشارونو سره مخامخ وه او له همدې کبله یې ځان وژلی.
ځایي چارواکو په دې اړه هم رسنيو ته څه نه دي ويلي.