تاند:( جمعه، د حمل ۱۹ مه) د پاکستان د سياسي کړکېچ په دوام، د دغه هېواد سترې محکمې پرون د پارلمان د لغوه کیدو په اړه د ولسمشر عارف علوي پریکړه رد کړه.
د ولسمشر یاده پریکړه د صدراعظم عمران خان په غوښتنه په داسې وخت شوې وه، چې د پاکستان د حکومت مخالفو ګوندونو په پارلمان کې له صدراعظم عمران خان څخه د باور رایې د بیرته اخیستو او په دې ډول د هغه د ګوښه کیدو پلان چمتو کړی و.
د عمران خان مخالفو ګوندونو د پارلمان د لغوه کیدو د پریکړې په اړه سترې محکمې ته شکایت کړی و، چې محکمې د ولسمشر پریکړه رد او د پارلمان د فعال ساتلو اعلان وکړ.
صدراعظم عمران خان نن د سترې محکمې له پریکړې وروسته، د کابینې بېړنۍ غونډه غوښتې او دغه راز یې د ورځې په پای کې ملت ته د وینا اعلان کړی دی.
شنونکي فکر کوي، چې عمران خان به اوس یا له پارلمان څخه د خپل ګوند او پلویانو د استعفا هڅه کوي، یا به خپله استعفا کوي او يا به د بېړني حالت د اعلان هڅه وکړي، چې په ټولو کې تاوان کوي او وروستۍ پریکړه خو د پوځ له همغږۍ پرته، چې ورسره سخت مخالف دی، نه شي کولای.
د پاکستان د حکومت یو شمېر مخالفینو او له هغې ډلې مشهورو پښتنو ملتپالو: افراسياب خټک او محسن داوړ د پاکستان د سترې محکمې د پریکړې هرکلی کړی دی.