تاند:( پنجشنبه، د حمل ۱۸ مه) د پاکستان تر واک لاندې په پښتونخوا کې مېشتو د افغان کډوالو یو شمېر مهمو دیني علماو د نجونو د تعلیم په تړاو اعلامیه خپره کړې او لاسلیک کړې.
دوی په دې اعلاميه کې طالبانو ته وریاده کړې چې د عصري او دینو علومو زده کړه د ښځو مسلم حق دی.
په ټولنیزو رسنیو کې ډېرو افغان فعالانو د پښتونخوا مېشتو افغان دیني عالمانو د دې اعلاميې هرکلی کړی او له خپرولو سره یې طالبان هڅولي چې له شپږم ټولګي څخه د نجونو د پورته ښوونځيو تړلې دروازې بیرته پرانیزي.
طالبانو په دې اړه د ډېرو نورو غوښتنو په شان، دی غوښتنې ته هم کوم غبرګون نه دی ښودلی.
په ټولنیزو رسنیو کې يو شمېر مهم طالب مبلغين هم د نجونو د ښوونځيو د پرانيستلو غوښتنه کوي، خو معلومه نه ده چې طالبانو د دغو ښوونځيو د تړلو په اړه پریکړه له کومه ځايه او په کومو دلایلو کړې ده.
نن په افغانستان کې د ملګرو ملتونو د سرمنشي د ځانګړې استازې د دفتر ( یوناما) مرستیالې وويل چې د طالبانو ډېرې مهمې پریکړې د دوی په کابينه کې نه، بلکې په یوه نا معلوم ځای کې کیږي.
طالبانو په دې اړه شکونو او ادعاوو ته، چې تر ډېره له پاکستان څخه د دوی د کنټرول په اړه دي، څه نه وايي.