تاند:( پنجشنبه، د حمل ۱۸ مه) د طالبانو د رییس الوزرا اقتصادي مرستیال ملا عبدالغني برادر نن په یوه سفر سرپل ولايت ته تللی، څو د قشقري په نوم د تېلو د استخراج د يوه بلاک پرانيسته وکړي.
د طالبانو تر کنټرول لاندې باختر خبري اژانس ويلي، چې له هغه سره په دې سفر کې د طالبانو د معادن او پټرولیم وزیر مولوي شهاب الدين دلاور او ځینې نور چارواکي هم ملګري دي.
باختر اژانس د تېلو د استخراج د دغه بلاک په اړه ليکلي، چې ۱۰ څاه ګانې لري او له هغې ډلې نهه څاه ګانې یې د تېلو د استخراج لپاره چمتو دي.
سرچینه زیاتوي، چې د دې پروژې له پرانيستلو سره به د طالبانو حکومت ته هره ورځ له سل زرو تر يو نيم سل زرو ډالرو پورې عابد په برخه شي.
طالبانو د یادې پروژې په اړه نور جزییات نه دي ورکړي.
د دوی حکومت د خپلو لګښتونو د تمويل لپاره تر ډېره د افغانستان د معدنونو استخراج ته هیله لري، خو اړوند کارپوهان ټينګار کوي، چې د طالبانو د حکومت غیرې متخصصې څېرې ته په کتو سره به په دې ډول اقداماتو کې افغانستان تاوان وکړي.
بهتره به وی چه چین ته د سپږو صادرات شروع کړی