تاند:( چار شنبه، د حمل ۱۷ مه) د ایران مهر خبري اژانس وايي، چې طالبانو یې هېواد سره د هلمند اوبو د مدیریت لپاره د همکارۍ هوکړه کړې ده.
سرچينه زياتوي، چې دا هوکړه د طالبانو د اوبو او انرژۍ وزارت سرپرست مولوي عبدالطيف منصور په کابل کې د ایران د سفیر مرستیال سید حسن مرتضوي سره د لیدنې پر مهال وکړه.
طالب وزير په دې لیدنه کې ویلي، چې وروستیو وچکالیو د هلمند سیند د اوبو سطحه متاثره کړې ده.
د ایراني رسنۍ په حواله، دواړو لوريو هوکړه وکړه، چې د ياد شوي سیند د اوبو د مدیریت لپاره به ګډه همکاري سره وکړي.
د دغې ادعا شوې هوکړې نور جزییات نه دي روښانه شوي.
طالبانو په دې اړه څه نه دي ويلي.
مخکې ایران ته د کمال خان بند د اوبو د ور پريښودو او د طالبانو او ايران ترمنځ د افغانستان پر اوبو د ځینو معاملو ادعاوې شوې وې، خو طالب چارواکو په دې اړه د پخوانيو هوکړو له مخې د همکارۍ خبر ورکړی و.
د هلمند د اوبو مدیریت د ایران کار ندی . که دوی وغواړي په ګډه د هلمند اوبه مدیریت کړي ، دا به د افغانستان په کورنیو چارو کې مستقیمه مداخله وي .
پدې اړه د دواړو هېوادونو ترمنځ په 1352 کال کې یو قرارداد لاسلیک شوی او ټولې ستونزې پکې پیشبیني شویدي .
البته د هلمند د اوبو سطحه د وروستیو وچکالیو له امله ډېره ټیټه شوېده ، بنا د اوبو د حجم او مقدار په اندازه باید ایران ته کمې اوبه ورکړل شي .