تاند:(دوشنبه، د حمل ۱۵ مه) ايراني چارواکو په افغانستان کې د «تفرقه اچوونکو دسيسو» په اړه د خبرداري تر څنګ له طالب چارواکو غوښتي چې د افغانانو د امنیت د ساتلو په برخه کې خپل مسوولیت ومني.
د ایران د بهرنیو چارو وزارت ویاند سعید خطیب زاده دا څرګندونې د خواشينۍ په هغه پيغام کې کړي چې په هرات کې پر افغان شیعه ګانو د وروستۍ چاودنې په اړه يې خپور کړی.
د ایران د بهرنیو چارو وزارت وياند د داسې بریدونو زیاتوالي ته اشارې کړې خو په دې اړه یې څه نه دي ویلي چې د دغو ادعا شويو دسیسو شاته څوک لاس لري.
څو ورځې مخکې د هرات په جبرییل ښارګوټي کې چې تر ډېره شیعه مېشته سیمه ده، ځانمرګی برید وشو او له امله یې لسګونه تنه ټپیان او وژل شوي دي.
د دغه برید مسؤولیت داعش ډلې پر غاړه اخيستی.
دا په داسې حال کې ده چې طالبان په پرله پسې ډول د داعش ډلې د موجوديت او فعاليتونو ادعاوې ردوي او بې بنسټه یې ګڼي.
طالبانو د ایران د بهرنیو چارو وزارت تازه څرګندونو ته کوم غبرګون نه دی ښودلی.
مخکې ایران په داسې څرګندونو امریکا تورنوله چې ګواکې په افغانستان کې مذهبي تفرقې ته لمن وهي.