تاند، سه شنبه، د ثور ۳۰مه: د ملګرو ملتونو مرستندویه پلاوی یوناما وايي، افغانستان کې د طالبان او افغان حکومت له لوري بریدونو کې د ملکي وګړو تلفات ډېر شوي دي.
یوناما په خپل راپور چې نن ( سه شنبه غويي ۳۰ ) یې خپور کړی، ویلي چې د جګړې ښیکلې غاړې د ملکي وګړو د تلفاتو لامل دي او له همدې امله یې د جګړې د درولو بېړنې غوښتنه کړې ده.
د یوناما د تازه راپور د لومړنیو معلوماتو له مخې طالبانو او افغان ملي امنیتي ځواکونو لخوا د ترسره شویو عملیاتو له امله د اپریل په میاشت کې د ملکي تلفاتو د ډیریدو ښکارندویي کوي.
راپور کې ویل شوي چې طالبان اپریل میاشت کې د ۲۰۸ ملکي کسانو د تلفاتو مسؤل دي، چې د ۲۰۱۹ کال د اپریل میاشتې په پرتله ۲۵ سلنه ډېروالی ښکاره کوي.
یوناما د افغان امنیتي ځواکونو له لوري بریدونو کې هم ملکي کسانو ته د بې سارې مرګ ژوبلې خبر ورکوي.
راپور کې ویل شوي چې افغان امنیتي ځواکونو اپریل میاشت کې ۱۷۲ ملکي کسانو ته تلفات اړولي چې د ۲۰۱۹ کال د اپریل میاشتې په پرتله ۳۸ سلنه ډېروالی پکې راغلی دی.
یوناما اندېښنه څرګنده کړې چې ښکیل لوري د جګړې پر مهال نړیولو بشري قانون ته درناوی نه کوي، او ویلي چې په روغتونونو برید، د افغان امنیتي ځواکونو له لوري د هوايي بریدونو پر مهال له احتیاط څخه کار نه اخیستل هغه څه دي چې د ملکي تلفاتو د ډېرېدو لامل ګرځېدلي دي.