تاند:(یکشنبه، د حمل اوومه) د بي بي سي او امريکا غږ رسنيو ځينو سرچينو ويلي چې طالبانو يې په افغانستان کې پر تلویزیوني خپرونو بنديز لګولی دی.
دوی د طالبانو په حواله ويلي چې ياده پرېکړه د طالبانو «مشرتابه» کړې خو دليل یې نه دی روښانه شوی.
د يادو رسنيو ټلويزيوني خپرونې د افغانستان له یو شمېر خصوصي ټلویزونونو څخه خپریدې.
د بي بي سي په نړیوال سرویس کې د ژبو ريیس طارق کفاله نن ویلي«په افغانستان کې د بي بي سي پښتو، فارسي او ازبکي ژبو تلویزیوني خپرونې وروسته له دې په افغانستان کې بندې شوي چې طالبانو په افغانستان کې د بي بي سي خپرونکو چاینلونو ته امر وکړ چې نړیوالې خپرونې ودروي.»
Statement on BBC News bulletins in #Afghanistan pic.twitter.com/FNrceErD0t
— BBC News Press Team (@BBCNewsPR) March 27, 2022
ګومان کېږي چې د دغو رسنيو د تړل کیدو عمده دليل به پر دې رسنيو د طالبانو نه کنټرول وي.
د افغانستان نيږدې ټولې داخلي رسنۍ د طالبانو تر سخت سانسور لاندې دي، تر دې چې ويل کيږي د مېلمنو تر ليستونو پورې طالب چارواکي ورته تاييدوي او ډېری خپرونې او خبري سرويسونه له خپریدو مخکې سانسوريږي.
طالبانو په رسمي ډول د دغو بهرنيو رسنيو په اړه څه نه دي ويلي.
د طالبانو له واکمنیدو سره په افغانستان کې د بيان ازادي سخته محدوده شوې او د سلګونه رسنيو د تړل کیدو تر څنګ ګڼ خبریالان او فعالان د دوی پر کړنو د نیوکو له کبله وژل شوي، بندیان شوي او هېواد پريښودو ته اړ شوي دي.