تاند(جمعه، د حمل ۵ مه) امریکا وايي، وروسته له دې چې طالبانو له شپږم ټولګي پورته د نجونو د زده کړو له دوام سره مخالفت وکړ، واشنګټن د طالبانو له رژیم سره په اقتصادي موضوعاتو خبرې لغوه کړې.

د امریکا د بهرنیو چارو وزارت یوه چارواکي نن (جمعه) رویټرز خبري اژانس ته وویل چې امریکا د قطر په پلازمېنه دوحه کې د اوونۍ په پای کې (شنبه او یکشنبه) د افغانستان بانک، د افغاني بانکنوټونو د چاپ او د افغانستان د تعلیمي سیکتور لپاره د نړیوال بانک د سلګونو ملیون ډالرو د بسپنې په اړه له طالبانو سره د خبرو اترو ټاکل شوی پلان لغوه کړ.

د طالبانو له لوري له شپږم ټولګي پورته نجونو ته د زده کړو د حق نه ورکولو نه یوازې په افغانستان کې خلک غوسه کړي بلکې د نړیوالو غوسه یې هم پارولې ده.

د طالبانو په منځ کې د کم سوادو سرزورو عناصرو له لاسه یوازې د امریکا دا پرېکړه چې په دوحه کې له طالبانو سره خبرې نه کوي، افغانستان ته څو سوه ملیون ډالره زیان اوړي.

د سرزورو دا پرېکړه ډېرو طالب پلوو هم په مستقیم او غیر مستقیم ډول غندلې ده او ډېر نور طالبان، بې له دې چې غبرګون وښيي، پرې خوابدي دي.

د امریکا (دي هیل) ورځپاڼې د امریکايي چارواکو په قول ویلي چې دوی په افغانستان کې د طالبانو له حکومت سره په دې اړه چې افغانستاان ته مرستې وکړي، کار کوي خو شرط دا دی چې طالب مشران د بشري حقونو سرغړونې پای ته ورسوي.

د ورځپاڼې پر اساس، امریکايي مشرانو ځینې مرستې ورکړي. په جنورۍ میاشت کې سپینې ماڼۍ د افغانستان لپاره ۳۰۸ ملیون ډالره بشري مرسته اعلان کړه. د امریکا ولسمشر جو بایډن هم په فبرورۍ کې اعلان وکړ چې د افغانستان ۷ ملیارده کنګل شوې شتمني به په دوو برخو وویشي او نیمايي به یې افغانستان ته د بشري چارو لپاره ځانګړې کړي.

د امریکا د ولسمشر دا پرېکړه د افغانانو او نړیوالو او حتي یو شمېر امریکايي شخصیتونو له سخت غبرګون سره مخامخ شوه. خو د امریکا دا پرېکړه  له دې سره وتړل شوه چې ایا افغان نجونو ته تر دوولسم ټولکي پورې د زده کړو اجازه ورکول کېږي او که نه.

ښايي اوس اکثره افغانان د دې غوښتونکي وي چې امریکا دې تر هغو د افغانستان شتمني د طالبانو رژیم ته نه ورکوي چې طالبانو د نجونو او ښځو د تعلیم په شمول ټولو بشري حقونو ته غاړه نه وي ایښې.