تاند(جمعه، د حوت ۲۷ مه) د هندي رسنیو د راپور له مخې، د افغانستان د ط حکومت له هند څخه غوښتي چې په کابل کې خپل سفارت پرانیزي.

سره له دې چې د هند په نظر د طالبانو حکومت پاکستان پلوه ښکاري او طالبان هم د هند په اړه مثبت نظر نه لري خو په تېرو اوو میاشتو کې چې طالبان واک ته رسېدلي، هند له افغانستان سره تر پاکستان ډېره مرسته کړې ده.

د طالبانو د قطر د دفتر مشر سُهیل شاهین پرون (پنجشنبې) وویل چې د طالبانو حکومت چمتو دی چې په کابل کې د هند د دیپلوماتیک حضور لپاره، چې د دوو هیوادونو د دوه اړخیزو اړیکو لپاره مهم دی، خوندي چاپېریال برابر کړي.

شاهین وویل:«موږ د هند په شمول له ټولو هغو هیوادونو څخه چې په کابل کې یې سفارتونه لرل، غواړو چې خپل سفارتونه پرانیزي او عادي فعالیتونه پیل کاندي. موږ دوی ته د خوندي او امن چاپېریال برابرولو ته ژمن یوو. دیپلوماتیک حضور د دوه اړخیزو اړیکو د پراختیا لپاره مهم دی.»

هند د طالبانو له واک ته رسېدو وروسته په څلورو پېرو کې افغانستان ته ۸ زره ټنه غنم رالېږلي او په پام کې لري چې ټولټال ۵۰ زره ټنه غنم راولیږي.

افغانستان ته د هند د غنمو د مرستې په رالیږلو کې پاکستان ډېر خنډونه پېښ کړل او په میاشتو – میاشتو یې وځنډول.

هند په تېرو ۲۰ کلونو کې له افغانستان سره د شاوخوا ۴ ملیارد ډالرو په ارزښت مرستې کړي چې په هغو ګڼ شمېر سړکونه، پلونه، ودانۍ او برېښناکوټونه جوړ شوي دي.