تاند:(جمعه، د حوت ۲۷ مه) يو شمېر خلکو د طالبانو هغه عمل غندلی چې د یوې بورۍ اوړو د غلا په تور یې په غور ولايت کې يو کس په خره سرچپه ګرځولی دی.
ځایي سرچينو ويلي چې په غلا تورن کس د غور د مرکز فيروز کوه ښار د بازار څوکیدار و.
طالب چارواکو په دې اړه څه نه دي ويلي، خو خلکو په ټولنیزو رسنیو کې د نوموړي کس د دا ډول صحرايي محاکمې ویدیو خپره کړې او ورته غوسه دي.
منتقدانو ويلي چې د اسلامي اصولو په اساس طالبان، چې ځان اسلامي نظام ګڼي، لومړی بايد خلکو ته د نفقې برابرولو زمینه برابره کړي.
دوی د طالبانو دا ډول صحرايي محکمې د اسلامي او بشري اصولو خلاف ګڼلي.
د طالبانو د رييس الوزرا اداري مرستيال مولوي عبدالسلام حنفي څه موده مخکې د ملګرو ملتونو له یوه مقام سره په کتنه کې ټینګار کړی و، چې دوی د صحرايي محکمو خلاف دي او مخنيوي ته یې کار کوي.
په غور او ځینو نورو لیرې پرتو ولايتونو کې طالبانو تر دې مخکې په مختلفو تورونو یو شمېر خلکو ته د صحرايي محکمو پر وخت د سنګسار په شان سزاوې ورکړي دي.
د ملګرو ملتونو د ارقامو له مخې، په افغانستان کې د فقر او بېوزلۍ کچه مخ په بره روانه ده او ۲۳ ميليونه خلک د خوراکي توکيو له نشتوالي کړيږي.